LAI SIANGTHO HOLIM NA Volum.10

Rev: Suan Khan Thang (Mualpi-Tonzang)

Khangno lai na hih na thu hangin mi te sim mawh ding in na om kei in. 1Tim 4:12

Khangno hihna pen kum tua pan tua ciang cih gen ding haksa hi. Lei tung vai ki makaih nate ah nawine lai te, nawi ne lai te khit ah Pre school kah te, tua te zom ah, Primary school kah te, Middle School kah te, High school kah te, Universiti kah te om to dim diam hi. Tua khit ciangin Zi nei tanei, pasal nei, nu khang lai, pa khang lai te ki hel hi. Tua zom ah papi sam kang nupi sam kang te tawh ki zom to hi. Pawlpi tuam tuam te ah zong Sunday school, a dawl dawl in khen in Primer, Intermediate, Adult cih bangin khento in, khangno Papi khin, nupi khin lamte, adult sunday school sung ah gawmin uham te tawh ki sin khawm hi. Paul in Timothy a lai khak na ah khang no na hih na cihthu na gen hi. Timothy pen khangno khat a hih hangin Pasian aa ding a siamna, a hatna a hun khem peuh zangin a lu tungah mi siangte khut ngakna a ngah mi khat hi cih ih mu hi. 1Tim 4: 12BTu hun ah Laisiangtho sang kah ziah ziah in, ahih kei leh lai gal sim na tawh ih mun ih gam din mun ciat tawh ki zui in lu khu neel kai (degree) ih la ziah ziah thei ta hi. Pasian tung ah lungdam hang. Kua kua Laisiangtho sang eng tuan lo in ei sang ciat ah a hun pia aa a kum a kha a ih sin Pasian thu, Pasian aa ding a ih met bawlna in ei mah mah i thupi na, i cih tak na leh, ih cih tak loh na, hong lang sak hi. Pasian hanga a cihtak na tawh nasem aa Pasian gam aa ding khitui nap tui tawh na a sem, sim mawh nuainen na zah ko na, bawl siat na, gen theihna, sum leh paai cih mawh na, mi deih loh lam thei na pi mah Pasian na sep ken kan na, lang pan na te tam mah ta leh Jesus min tawh ih thuakna te in thu um mi pa ih hih na hong lang sak hi. A tua teng mah na thuak man in Pasian khuavak a tang sak sak hi teh. Paul in “Phil 4:12 Ka hau aa ka zawng zongin, ka kial aa ka vah zongin, koi mun, koi mun ah om ta leng a lung kim thei dingin a ki sin sa hing. Khrist Jesus hangin hih te khempeuh nawk zawh na ding tha hat na nei ing” na ci zo hi. Hih bang a i thuak ten tan zawh mah ciang in zong a thuak zo ten tan pa, ki suak thei pan a a hong sim mawh pa in zong na thuak zawh na ah mat hong pia ve ve ding hi. Ong sim mawh ngam nawn lo ding hi. Thupha ih ngah na dingin ong sim mawh, ong hua ma mah mi khat ki sam aa, tua ong sim mawh nu, ong sim mawh pa tung pan mah in thu pha ong pai se se ding ci in ki zo sa in na om khol leng thuak nop pen ding hi. Paul in a lung sim sung ah a hi zongin, a pumpi tung ah a hi zongin a thuak lang pan na pawlkhat ong pu lak hi. “Ka thong kiat na bel guk tak laak tak thu tuam tuam vai hi lo in, Christ na ka sep na hang hi. Mi pawl khat in kei hong ha zat naleh hong lang pan nop na tawh Christ thu hilh uh a, ka thong kiat na ah na ka sak sem sem theih na dingin kei ong demna un, Christ thu hilh uh hi. Lungsim tak pi tawh a hi vua lungsim tuam tuam tawh a hi zongin Christ thu ahilh nung sang uh ka lung kim lel hi” ci hi. Phil 1:13-18 Tua hangin Pasian na sem ciat ciat lak mah ah zong ki dem nopna, ki lang pan na, ki el na a bei ngei ding hi lo aa, hih bang aa a thong kiat na hangin mi tam pi in Pasian min hangin thuak ngam na nei in upna sung ah kipna in nei uh hi. “Khangno lai na hih na hangin sim mawh in om kei in” ci hi Khang no hih na tawh heh baih thei, huai ham thei, ki pa laang gawp thei hi, hih te hang in sim mawh na om ding Paul in phal lo hi. Kam pau na gam tat na upna leh sianthona ah thu um mi te et teh ding in na om in” ci hi. Ih kam pau te zong thu um mi te pau dingin a ki lawm lo om thei hi. Ih gam tat na te zong lam gei aa vak mawk te sangin zong sia zaw thei hi. Ih inn kuan pih te tung a hi a, thu up pih mi te tung a hi zongin midang khat peuh tungah a hi zongin itna, lah khiat theih ding mi et teh ding ki sam hi. Upna te zong, upna thu tawh ki sai a leh lam in pheng gen lo a Pasian min zang khai bawl loh ding thupi hi. Pasian zah takin siangtho na ah et teh taak suah ding ki sam hi. Kam sang te thu gen na te leh Upa te in, na lu tung aa, thu ong nget sak na a hi nangma hih theih siamna te valkhong sak kei in. 1Tim 4: 14.Kamsang te in na kal suan zia ding ong lam lak zong om thei hi. Tua te zong man ding ki lawm bang mang leng ih vai ong hoih ding hi. Nang tua sem ding, nang a tua ding ci aa upa te in kip sakna lu tung khut ngak thu nget sakna, na tung ah ong neih sak na tawh ki zui in cih tak na tawh han ciam in om le cin, khangno Pasianna sem na hih hangin sim mawh na tawh na ki pelh theih ding hi.

Motto: Matthew: 18:20Date: 17/ 2/ 2013

Thumna: Zo lai siam lo ka hih man un lai mal khial a om leh nong mai sak nang leh lung duai tak in nong sim sak na ding in Jesus min suan in kong thum uh hi:

mail to: suankthang@gmail.com