.. shrI dakSiNAmUrti stotram .. shArdUlavikrIDita atidhR^Iti chhandas - 19 vishvaM darpaNadR^ishyamAnanagarItulyaM nijAntargataM pashyannAtmani mAyayA bahirivodbhUtaM yadA nidrayA. yaH sAkSAtkurute prabodhasamaye svAtmAnamevAdvayaM tasmai shrIgurumUrtaye nama idaM shrIdakSiNAmUrtaye .. 1.. bIjasyAntarivA~Nkuro jagadidaM prA~NnirvikalpaM punaH mAyAkalpitadeshakAlakalanAvaichitryachitrIkR^itam. mAyAvIva vijR^imbhayatyapi mahAyogIva yaH svechchhayA tasmai shrIgurumUrtaye nama idaM shrIdakSiNAmUrtaye .. 2.. yasyaiva sphuraNaM sadAtmakamasatkalpArthakaM bhAsate sAkSAttattvamasIti vedavachasA yo bodhayatyAshritAn yatsAkSAtkaraNAdbhavenna punarAvR^ittirbhavAmbhonidhau tasmai shrIgurumUrtaye nama idaM shrIdakSiNAmUrtaye .. 3.. nAnAchchhidraghaTodarasthitamahAdIpaprabhAbhAsvaraM GYAnaM yasya tu chakSurAdikaraNadvArA bahiH spandate . jAnAmIti tameva bhAntamanubhAtyetatsamastaM jagat tasmai shrIgurumUrtaye nama idaM shrIdakSiNAmUrtaye .. 4.. dehaM prANamapIndriyANyapi chalAM buddhiM cha shUnyaM viduH strIbAlAndhajaDopamAstvahamiti bhrAntA bhR^ishaM vAdinaH . mAyAshaktivilAsakalpitamahA vyAmohasaMhAriNe tasmai shrIgurumUrtaye nama idaM shrIdakSiNAmUrtaye .. 5.. rAhugrastadivAkarendusadR^isho mAyAsamAchchhAdanAt sanmAtraH karaNopasaMharaNato yo.abhUtsuSuptaH pumAn. prAgasvApsamiti prabodhasamaye yaH pratyabhiGYAyate tasmai shrIgurumUrtaye nama idaM shrIdakSiNAmUrtaye .. 6.. bAlyAdiSvapi jAgradAdiSu tathA sarvAsvavasthAsvapi vyAvR^ittAsvanuvartamAnamahamityantaH sphurantaM sadA . svAtmAnaM prakaTIkaroti bhajatAM yo mudrayA bhadrayA tasmai shrIgurumUrtaye nama idaM shrIdakSiNAmUrtaye .. 7.. vishvaM pashyati kAryakAraNatayA svasvAmisaMbandhataH shiSyAchAryatayA tayaiva pitR^iputrAdyAtmanA bhedataH . svapne jAgrati vA ya eSa puruSo mAyAparibhrAmitaH tasmai shrIgurumUrtaye nama idaM shrIdakSiNAmUrtaye .. 8.. bhUrambhAMsyanalo.anilo.ambaramaharnAtho himAMshuH pumAn ityAbhAti charAcharAtmakamidaM yasyaiva mUrtyaSTakam. nAnyatki~ncana vidyate vimR^ishatAM yasmAtparasmAdvibhoH tasmai shrIgurumUrtaye nama idaM shrIdakSiNAmUrtaye .. 9.. sarvAtmatvamiti sphuTIkR^itamidaM yasmAdamuSmin stave tenAsya shravaNAttadarthamananAddhyAnAcca sa~N^kIrtanAt. sarvAtmatvamahAvibhUtisahitaM syAdIshvaratvaM svataH siddhyettatpunaraSTadhA pariNataM caishvaryamavyAhatam.h .. 10.. mAlinI atishakvarI chhandas - 15 vaTaviTapisamIpe bhUmibhAge niSaNNaM sakalamunijanAnAM GYAnadAtAramArAt. tribhuvanagurumIshaM dakSiNAmUrtidevaM jananamaraNaduHkhacchhedadakSaM namAmi .. .. iti shrImacchha~NkarAcAryaviracitaM dakSiNAmUrtistotraM sampUrNam ..